SEO – ბრენდის საუკეთესო დამხმარე

SEO – ბრენდის საუკეთესო დამხმარე

ინტერნეტისთვის კონტენტის შექმნისას ერთი საკითხი ჰაერივით გამჭვირვალეა: თუ გსურს, რომ ხალხმა შენი მუშაობა დაინახოს, გჭირდება საძიებო სისტემის ოპტიმიზაცია, ასევე ცნობილი, როგორც SEO – Search Engine Optimization.

SEO აერთიანებს ყველაფერს, რაც უნდა გააკეთო იმისათვის, რომ შენი საიტი საძიებო სისტემების მოწინავე პოზიციებს იკავებდეს.

გუგლი რომ ბიბლიოთეკა იყოს, მისი საქმიანობა ასე გამოჩნდებოდა: ის ინახავს მთელი მსოფლიოს წიგნებს და ეძებს შენთვის რელევანტურ წიგნს. ის ყოველთვის ხვდება, რა არის უმჯობესი. სწორედ ამიტომ, გუგლი პირველია საძიებო სისტემებს შორის.

გუგლის თქმით, SEO ეყრდნობა პრაქტიკას და ამიტომ უნდა გავითვალისწინოთ რამდენიმე პუნქტი:

1. ხარისხი უმნიშვნელოვანესია
არსებობს გავრცელებული აზრი, რომ კონტენტი მთავარია, თუმცა უნდა აღინიშნოს, რომ შესაძლოა, შენ ქმნიდე კონტენტს, რომელიც მოგწონს, მაგრამ ეს იმას არ ნიშნავს, რომ ის იმუშავებს. შენ უნდა ასწავლო აუდიტორიას, გამოახატინო ემოციები და აღმოაჩენინო სიახლეები. თუკი შენი კონტენტი ვერაფერს აძლევს აუდიტორიას, ისმის კითხვა: „რისკენ მიილტვი?“. დაიწყე იმით, რომ შექმნა ღირებულებები, რომელიც დიდხანს დარჩება აქტუალური. რამდენადაც არ უნდა გაითვალისწინო ის რჩევები, რომელსაც ამ სტატიაში იპოვი, ვერაფერს გახდები, თუკი მათი ხარისხი მოწოდების სიმაღლეზე არ იქნება.

თუ დაივიწყებ იმას, რომ შენი კონტენტი უნდა იყოს ხარისხიანი, მაშინ შეგიძლია ისიც დაივიწყო, რომ SEO სტრატეგია გაქვს, რადგან ის არაფერს მოგიტანს.

2. ვინ აზიარებს?
ხარისხიანი კონტენტის არსებობა გაზიარებებსა და პოპულარულობას გიქადის. SEO-ს მდგომარეობაზე საგრძნობლად მოქმედებს ის, თუ ვინ და რა რაოდენობით აზიარებს შენს კონტენტს. შენს სტატიებს უნდა აზიარებდნენ ამა თუ იმ სფეროს ექსპერტები, ცნობილი ადამიანები, ინფლუენსერები, როგორც ცნობილ ფრთიან გამონათქვამშია, შენს სიმღერებს ხალხი უნდა მღეროდეს. თუკი გუგლი დაინახავს, რომ შენს კონტენტს ბევრი აზიარებს, გადაწყვეტს რომ გამოხმაურება პირდაპირპროპორციულია ხარისხთან.

3. ბრენდის ქროსლინკინგი (crosslinking)
შენი ბრენდის რელევანტურობისთვის ერთ-ერთი საუკეთესო საშუალებაა ქროსლინკინგი – სხვადასხვა საიტებზე გადაკვეთა. მაგალითად, თუკი შენს ბიზნესს აქვს ექაუნთები ტვიტერზე, იუთუბზე, ბიჰანსზე საერთო სახელით, ეს აძლევს გუგლს საშუალებას, რომ იცოდეს, რომ ეს ექაუნთები საერთო საქმეს ემსახურება და ბრენდი, რომელსაც მოწინავე პოზიციები უჭირავს, მრავალფეროვანია.

დარწმუნდი, რომ დალინკულ პლატფორმაზე ექაუნთს მდიდარი კონტენტი აქვს.

4. Keywords – საკვანძო სიტყვები
საკვანძო სიტყვებსა და საძიებო ტერმინებს გუგლი იყენებს იმისთვის, რომ სწორად განსაჯოს შენი საიტის დანიშნულება. მათ ძალიან დიდი მნიშვნელობა აქვს შენი ბრენდის პოზიციების გასამყარებლად. თუმცა სტატიის საკვანძო სიტყვებით უადგილოდ გავსება გუგლს არ ეხმარება, არამედ პირიქით, თუკი გუგლის მოტყუებას შეეცდებით, შედეგი სავალალო იქნება.
საკვანძო სიტყვების ერთ-ერთი მნიშვნელოვანი პუნქტია თქვენი კონტენტის სათაური. სათაური უნდა იყოს მოკლე და კონკრეტული, იწვევდეს საკმარის ინტერესს, იმისთვის, რომ მომხმარებელს მოუნდეს ლინკზე გადასვლა.

5. კონტენტის სიღრმე და ლაკონიურობა
როგორც იტყვიან, „წყალნი წავლენ და წამოვლენ, გუგლი დარჩებაო“, ის დრო კი დიდი ხანია წავიდა, როდესაც 300 სიტყვიანი სტატიის ბმულით გალამაზება შეიძლებოდა და ეს სტატია ყველა ძიების შედეგის მოწინავე პოზიციებს დაიკავებდა. გუგლი დაიხვეწა და უკვე კარგად ხვდება, რომ თუკი კონტენტი ძალიან მცირე მოცულობისაა, ნაკლებად სრულ ინფორმაციას მოიცავს. ეს, რა თქმა უნდა, არ ნიშნავს იმას, რომ სტატია რომანის მოცულობის უნდა იყოს. ნუ დაახარჯვინებ ადამიანებს დროს იმაში, რაც მათ არ გამოადგებათ, მაგრამ ამასთანავე, გახსოვდეს, რომ ინფორმაციულად დატვირთულ კონტენტს არაფერი ჯობია.

გუგლი მიილტვის იმისკენ, რომ მიაწოდოს ადამიანებს ხარისხიანი პროდუქტი, რომელიც პასუხობს მოხმარებლის მოთხოვნებს. ისევ ბიბლიოთეკის მაგალითს რომ მივუბრუნდეთ, გუგლს არ აქვს დრო იმ წიგნებისთვის, რომლებიც სხვა რამეს გეუბნებიან ყდით, ხოლო შინაარსი სულ სხვა აქვთ. ნუ შეიყვან გუგლს შეცდომაში, რადგან ეს ავტომატურად გუგლის შავ სიაში მოხვედრას ნიშნავს.

ჩამოთვლილი პუნქტები SEO-ს საძირკველია. არ აქვს მნიშვნელობა, კიდევ რამდენჯერ შეიცვლება გუგლის ალგორითმი, რადგან ეს რამდენიმე რჩევა საშუალებას მოგცემს ნებისმიერი ალგორითმის შემთხვევაში შენი საიტი დარჩეს საძიებო სისტემის მოწინავე პოზიციებზე.

მოგვწერეთ